"SELAMAT DATANG KE BLOG INI. GUNAKANLAH IANYA UNTUK TUJUAN BERKONGSI PENGETAHUAN MEMBINA DAN POSITIF. ADALAH TIDAK DIBENARKAN SAMA SEKALI MENGGUNAKAN BLOG INI UNTUK TUJUAN MENGKRITIK DAN MENFITNAH MANA-MANA PIHAK SERTA MENYEBARKAN BERITA PALSU ATAU YANG BOLEH MENGAIBKAN DAN MEMALUKAN PIHAK-PIHAK TERTENTU. BEGITU JUGA PERKARA-PERKARA YANG BERKAITAN DENGAN ISU-ISU POLITIK TIDAK DIBENARKAN SAMA SEKALI DIBINCANGKAN DALAM BLOG INI."

30 April 2011

SAPA AKU, SAPA IYA TAUKA SAPA NUAN DALAM DUNYA TU……??


Selamat betemu baru bala pangan semua… Ke sekali tu aku ka bekenang enggau kita semua pasal siti cerita pasal ulah kitai mensia ti enggah kelia udah nyadi, kelebih agi ba bansa kitai empu. Perkara tu kala nyadi ba aku empu. Beketu ko cerita tu kaban….. Ba siti nengeri kitai tu kaban…aku kala tepeda ka bala kaban aku maya ti sekula suba benung kiruh enggau orang begaul ke semin maya ti ngaga rumah, betul ia rumah ti digaga sida ba nengeri nya ianya rumah kaban aku empu. Nyadi maya ti bejalai kia iya tekenyit tepeda ka aku lalu kasak-kasak kaban tadi baka ti deka ngelarika diri sereta ngelalaika diri. Aku asai ti ngelala ke enda meda iya laban ragum enggau sumit iya panjai amat. Enda nyamai ati tudah aku tadi, lalu nguji nanya iya, lalu nyebut nama iya. Nyau mirah mua tudah kaban tadi madahka  diri iya ngangau aku. Aku nguji nanya iya, nama hal iya baka ti enggai nanya aku, iya madah ngena leka jako tu;

“ Malu Son ka kita, nama ensaya kita udah kereja perintah, kami nama tu kerja kuli aja, peda pendiau aku tu nyau baka Aki orang….., ka nanya malu meh Son enggaika kita malu sereta enggau begulai enggau kami, kala aku meda nuan maya aku pulai ka Sri Aman, tapi malu ka nanya…. Aku kala betemu enggau bala kaban kitai kelia maya sekula, manah amat kereja sida bisi ti nyau bisi utai bepangkat besai, tekenyit aku Son lebuh ti berandau enggau sida baka ti enggai ngibuhka kitai, jako nyau lain amat…. Nya kebuah aku ngaga diri baka ti enda ngelala nuan tadi”, ko tudah iya ngemanjaika cerita iya. Nyadi utai ti baka tu tau amai dikerundingka kitai laban iya ti bansa tu udah lama amat udah nyadi. Aku udah nya lalu berandau manah enggau iya lalu mai iya ngirup ba kedai makai enda jauh ari nya. Udah nya mayuh meh cerita kami dua…

Nyadi belebuh ari nya aku lalu terunding, sigi amat meh pekara tu selalu ka nyadi ba pengidup kitai. Ba jurai tu bala kaban ba penemu aku, kitai patut nyaut dalam ati diri empu;

Sapa aku, iya tauka nuan?”… saut iya senang aja kaban….. “SAMA AJA KITAI “.

Nama kebuah saut iya tau bekenya…. Ketegal asal kitai sama, semua perengka tuboh chukup, mua mata chukup, tunjok jari kaki chukup, akal chukop…Cuma ti ngasuh kitai bebeda ianya pendiau pengidup ti enda sama diungkop ka Petara dalam dunya tu. Tapi pekara ti bansa tu enda lama kaban, sementara aja laban kitai semina nginjau dunya tu sementara aja baka orang ti ngendoh enda lama ba dampa maya ari ujan… Ambi ka banding dalam pengidup tu, kediatu kami tu diberi pengawa ti manah, kita lain…tapi anang irau ketegal ari peransang pendiau pengidup kita kediatu, kita tau ngatur pengidup bala anak kita, awakka tau mujor, mai pengelantang ngagai kita.. Baka kami tu enti enda mujor ngatur anak pen tau kebaruh.. laban dalam kitar pengidup kitai tu bisi maya kitai tau di atas, bisi maya tau kebaruh.

Nyadi baka asai aku empu ngagai kaban lama semua anang irau… tanya meh maya ti betemu, ukai ga madah aku tu manah, tapi enti kita ngelala aku enda ngira kita diau di menua, kereja perintah tauka kompeni, tanya aja. Udah kita berandau duduk nunga kopi ke makai mee ke baru kitai ulih nemu bulu pangan diri. Kebuah pia laban aku empu kelia endang asal ari rumah panjai, apai indai ukai kerja perintah, kala diau ba dampa, bemalam ba langkau kebun, mutung, nangkal, bumai sereta kerja bukai di menua. Engka pengidup aku diatu ulih beketu laban penyedar aku empu ketegal pedis agi biak kelia, lalu ngasuh belajar amat sereta lalu tulihka kerja baka ti diatu. Enda ga nyamai amat, ukai ga kaya, tang ulih ga enggau orang nyepi sesuap asi mimit….

Ukai ga semua sama, baka padi meh…bisi isi bisi ga antah. Bekenya meh dalam pendiau sereta ulah mensia. Amat ko cerita sekeda kaban, maya sekula manah tapi udah lepas ari nya nyau berubah amat amat pendiau ulah sereta peranggai ketegal ari arus pengidup baru ti diasai ka bala sida. Ba aku sama aja kitai kaban, enda ngira kita di menua, kereja perintah, kereja kompeni tau ka bekerja kediri empu, sama aja…. Aku enda nyangkung orang bukai. Kebuah pia laban ba taga aku empu kitai kelia kala begulai sejalai maya sekula, kunsi tanchut, kunsi selipar, kunsi duit, kunsi pemakai maya nya.. tanda nya kitai udah kala bekaban. Nadai pekara ti tau muai pangkat… “KABAN”.. kitai nya. Amat pen diatu kitai nyau enda sama pengidup, enda sama menua sereta enda sama kerja, tanggam rat jari maya kitai begulai suba tetap aku kingat, enda ngira sapa pangkat sereta darjat kita ko jako bansa kaban kitai.  Baka aku empu kadang-kadang enda tat ka agi ka pulai ke rumah panjai ka betemu enggau bala kaban di menua din, begulai ngerega pengawa enggau sida kena mantup pengingat sekula suba…. Engka bisi ka sekeda kitai kelia udah jauh berubah…jako nyau besai diatu…nyau milih bulu ko orang, biar aja meh nadai ko enggau. Cuma siti aja jako aku…baka jako dalam cerita LABU LABI….
” Tidak apalah Labu…ini hari engkau, esok hari aku…….”

Ketegal pengidup sereta pendiau bekenya antara pangan enggau kaban diri mayuh jako bansa kitai enggau orang bukai ti tau nyadi ka lalau kitai. Chunto; “ Madi perut jani…kaban perut ikan, bagai kacang lupa kulit”…. Nyadi uji berunding meh kitai…pengaya, pengeraja. Pangkat sereta darjat  ukai datai ari kitai, tang ari petara, enti kitai enda nemu ngena iya..mayuh chara petara tau ngambi ari kitai… Nadai guna ga duit bejuta, ruah besai sereta bereta, tapi budi basa ba pala patung….. ujung iya ila enda ga nya dibai kitai lebuh maya kitai nyau nadai. Ba tanah sama aja ga pemesai rumah kitai..”6 X 3 X 6 kaki”…. Chukop meh kitai nemu asal pendiau diri kelia.. anang kelia merinsa kelia, diatu lalu ka ngeluba ka diri…. Enti mayuh duit, intu meh bala anak dalam pengidup sereta kena jaga pendiau ruang bilik diri empu. Enda ibuh begasak ka iya kena ngukun mayuh reta tengkira, ngelumba orang sereta deka ngeninggika diri laban utai tu jemah nadai kini-kini…jemah enti kitai nyau kebaruh sama ga asai iya. Ngagai kaban ti diau di negeri, ingat meh kaban kitai ti diau nupi anak sida di menua. Enda ulih meh kitai nulong ngena mata duit, tapi tulong sereta sukong sida ngena basa ti sama, layan ti sama laban kelia kitai sama-sama kala begulai sekula. Sukong sida ngena ajar sereta jako peransang, ngica ka bala anak sida tau ngangkatka pendiau sida ulih nyepi penyamai baka keda kitai ti diau nengeri sereta bulih kereja ti manah. Anang munoh semengat sida kaban kitai enggau jako tinggi, sereta gaya pendiau ti tau ngelemi sereta ngerawan ka sida begulai enggau kitai. Ingat meh semua, ngagai bala kaban ti di menua tauka ti diau di negeri…..”SAPA AKU, SAPA NUAN tauka SAPA IYA”…Saut iya    “ SAMA AJA”…

UJI DUDUK ENDA LAMA MEH….BERUNDING DULU…

Tiada ulasan:

Catat Ulasan