CUTI - CUTI DI TANAH MALAYA !!!!

Nyadi di baruh tu bisi sekeda cerita kami menyanak maya ti bisi bejalai raun ke Semenanjung bedau lama ti udah. Maya kami ti kin nyamai mimit laban bisi menyadi aku empu bisi din lalu ulih mai kami sebilik, sida sebilik empu enggau bala petunggal aku bejalai matau menua ari Negeri Sembilan sampai ke Kuala Lumpur. Maya tu suba mayuh tempat dipelawa kami sebala berengkah ari tempat iya kereja ianya di Rembau, Negeri Sembilan sampai ke KL. Di antara tempat ti bisi dilawa kami ianya Pantai Port Dickson, Taman Tema Padas, Muzium Tentera ba PD, KLCC, Zoo Negara, Pusat Bandar Seremban enggau Pusat Kota Metropolitan KL. Laban ari ti suntuk sereta bala budak nyau lelak, kami enda ulih bejalai ke tempat-tempat bukai. Lapa ka enda, maya dudi ari ga bejalai baru kin. Nyadi ka batang pengawa tu manah ka kaul diri sebilik, sambil kitai mai nembiak anak kitai bejalai raun, awak ka nyadi peransang sida dalam sekula sereta ulih mujur pengidup ka jemah ila. Di baruh tu aku bisi nusi sekeda cerita sereta gambar kami ti bisi diambi tu tadi;

a). Raun ba Zoo Negara Kuala Lumpur

Zoo Negara ba KL siti tempat ti manah dilawa kelebih agi kitai ari Sarawak ti enda kala tauka jarang bejalai ke menua nyin. Masuk kia kitai bisi bebayar mimit, tapi enti mai nembiak sida cukup rindu bejalai kitu laban dalam nya mayuh macham jelu ditupi. Baka sida gajah, zirafah, seladang, beruang, rimau, ular, baya sereta mayuh macham jelu bukai. Enda berasai ngembihka 3 jam bejalai mai nembiak dia laban kempaun ia cukup besai alai kitai bejalai. Enti bebala mayuh cukup rindu kia. Tambah mega engka jemah kitai ka raun ke seberai tasik, asai aku manah dulu kitai bejalai ba menua diri empu dulu. Di baruh tu sekeda gambar kami sebilik enggau kami sebala ti bisi diambi aku maya nya.

b). Raun ke Aquaria KLCC, Kuala Lumpur

Pia mega maya nya kami mega bisi bejalai bebala mayuh ke KLCC. Bisi 10 iko tubuh kami sebala bejalai kia. Masuk kia pen bisi bebayar mar mimit, tapi ati cukup puas, cuma duit aja enda berasai kosong laban bebelika barang. Ba bangunan KLCC, siti tempat ti patut dilawa ianya Aquaria iya. Ba tempat tu unik siti laban ia bisi nempat ka akuarium besai alai orang nupi mayuh bansa ikan tasik baka sida ikan pari, jerung sereta mayuh bansa ikan bukai. Enti bejalai kia kitai bejalai dibaruh iya lalu ikan nya dalam kaca tebal ba tisi tauka atas pala kitai, Pia mega mayuh jelu darat bisi ditupi dia baka mayuh macham bansa ular kelebih agi mayuh diayanka spesis ular sawa ti besai. Nama agi deh bala anak ti lebih agi rindu, nyau penat kaki begagaika sida iya. Tau nguji wai tama kitu, manah amat, cuma bayar tama ka mar mimit. Tapi asai aku maya cuti skul, bisi offer tama kia.

c). Raun Mandi ba Taman Tema Padas, Rembau

Tempat tu siti tempat ti digaga baka Mini Sunway Lagoon. Tempat tu enti ujong minggu penuh alai bala mensia ti bebaika diri sebilik ngelantangka ati kia. Ba tempat tu bisi 2 replika ai digaga sida. Siti ianya laut ti digaga, sereta sungai digaga mensia. Tambah mega dala taman tu mega bisi kolam ai panas mayuh jenis. Nyadi tama kitu bisi bayar RM7-9 nda ngira pengelama. Pia mega kena mandi kitai ulih nyewa alat dia baka pelepuk enggau mayuh bansa utai bukai. Maya tu suba bala anak rindu agi mandi bemain ka ai. Kita meda gambar dibaruhnya kiruh bala apai bebaika sida. Asai aku enti sema kita bisi ari bejalai tauka bisi bejalai ke Negeri Sembilan tau ngagai tempat tu, umbah iya pemanah iya wai. Tempat tu ari segi ekosistem iya manah agi laban baka dalam taman negara laban bisi kayu besai dalam iya, enda panas sereta nadai tentu penuh laban orang nadai baka ba Sunway Lagoon KL. Bejalai kitu meh wai... Dibaru tu sekeda gambar bala kami maya nya.

d). Mandi ba Pantai Port Dickson, Negeri Sembilan

Pantai tu siti ari pantai ti cukup beberita ba Semenanjung din lama udah. Pemanas ditu ianya pantai iya. Cuma enti mai nembiak mit mesti ka dijaga amat laban ditu kelalu mayuh orang. Aku enda sempat begambar ditu laban umbas ti kiruh ngambar budak enggau bejaga ka sida. Enda berasai ari sari embih ditu wai, laban ba tempat tu nyamai alai kitai bebelika pemakai sekalika dibungkus tauka makai dia empu. Ditu kita ulih nyewa khemah ngena bayar RM15.00 sereta perengka bukai baka pelepuk, perau, jet ski enggau main bukai. Tempat tu enti ujung minggu chukup mayuh orang ari macham pupu raban bansa. Munyi ko jako orang lengah-lengah bejalai dia mayuh ga kitai ninga bansa kitai iban enggau orang dia sereta ulih bekelala enggau sida. Mayuh agi sida nya bala kitai iban ti bisi nyadi sedadu ti diau ba Kem PD dia empu. Lalu kitu meh kaban... Dibaruh tu sekeda gambar kami sebilik / sekaban ti bisi diambi aku.

e). Raun ke Muzium Tentera ba Port Dickson

Ari keterubah nguji matau menua ba nyin kemari bala kami bisi matau menua sereta raun ngagai Muzium Tentera ba Port Dickson. Muzium tu ngundan mayuh macham cerita pasal alat tentera sereta sejarah tentera kitai kelia. Ba tempat tu bisi diayanka jenis kereta kebal, bilun jet, helikopter, kereta api ti dikena bala sedadu kelia. Pia mega ba tempat tu bisi digaga Tugu Pengingat ngagai bala sedadu ti udah lesi bebadi maya ti ngetan ka menua kitai, kelebih agi ari ancam komunis kelia. Ditulis ba tugu tu mayuh ga aku meda nama kitai iban ti bisi ditulis dia. Siti tempat ti dikerinduka aku ianya, ditu bisi digaga replika terowong / lubang tanah ti digaga Parti Komunis Malaya(PKM) kelia. Dalam tu bisi diengkahka perengka ti kala dikena sida baka senjata, pinggai mangkuk, pakaian sereta utai bukai ti kala dikena bala komunis kelia. Asai aku enti belajar sejarah ba skul pasal PKM manah bala nembiak dibai kitu, tambah mega ia enda tentu jauh ari pantai. Arapka ulih kitu meh kaban. Dibaruh tu sekeda ari gambar ti bisi diambi kami sebilik.

TIPS NGADUKA MASALAH FOLDER OPTIONS, RUN ENGGAU REGISTRY EDITOR LENYAU DALAM KOMPUTER

Sekali tu aku deka madahka beberapa trick kena kitai ngemulaika sekeda fungsi dalam komputer kitai ti lenyau tauka dilalaika laban kena serang virus ti befungsi ulih ngena Supper Hidden. Sekeda fungsi ti selalu dilalai tauka lenyau ianya Folder Options, Registry Editor enggau Button RUN

Dibaruh tu bisi sekeda ari chara kena kita ngemulaika semuanya baru awakk ulih kena, tapi komputer kita mesti nadai virus dulu sereta beresi;

a). Ngemulaika Fungsi RUN dalam komputer
1. Giga gpedit.msc di (C:\WINNT\system32\gpedit.msc) atau (C:\WINDOWS\system32\gpedit.msc) dalam My Computer kita.
2. Double click” fail nya.
3. Pegi ngagai‘User configuration‘ -> ‘Administrative Templates‘ ->’Start Menu & Taskbar’
4. Pilih ‘Remove Run from Start Menu’ sereta klik 2 kali
5. Tanda Disabled sereta tekan APPLY
6. Udah lepas nya RESTART komputer kita

b). Ngemulaika Fungsi REGISTRY dalam komputer
Registry Editor (Regedit) sebengkah hal ti penting dalam Windows. Enti sema Regedit nadai ulih dibuka (disabled oleh administrator), pekara tu ulih diadu ngena chara dibaruh tu dalam Microsoft Windows XP:

1. Klik “Start”->”Run”
2. Taip gpedit.msc lalu tekan Enter
3. Masuk ke: User Configuration->Administrative Templates->System
4. Giga “Prevent Access to Registry Editing Tools”, double klik
5. Pilih “Disabled” tauka “Not Configured”, udahnya tekan OK
6. Tutup gpedit udahnya Restart komputer kita
7. Udahnya buka pasti Regedit kita ulih peda.

c). Ngemulaika Folder Option ti Lenyau Ngena Chara Nukar Group Policy

1. Klik RUN ba Start, udahnya taip gpedit.msc tekan ENTER.
2. Udah pansut gigi ngagai User Configuration -> Administrative Templates -> Windows Components -> Windows Explorer.
3. Ba Panel sepiak kanan peda “Removes the Folder Options menu item from the Tools menu”, tekan kanan mouse kita klik "Properties".
4. Tukar setting iya ari "Enabled" ngagai "Not Configured or Disabled".

Di atas tadi ianya chara manual kena kita ngaduka tiga bengkah pekara tu, tapi enti baru ngena sereta tepedaka pekara tu nyadi manah agi kitai ngena software ti disediaka free ba internet baka CCleaner enggau Registry Booster. Software tu ulih ngaduka ia automatik.

Terima Kasih.

KOMPUTER BERAT TAUKA LUBAH START

Selamat betemu baru ngagai bala pemacha semua. Nyadi ke sekali tu aku nulis siti pekara ti selalu nyadi ba komputer kitai. Ba ti udah-udah aku bisi madah pasal sekeda ari pekara tu. Tapi bisi sekeda pemacha emel aku minta aku nulis pekara pasal problem tu enggau jelas agi. Ok ba ke sekali tu aku ka madahka kita semua pasal masalah tu.

Ia ti ditanya kita ianya pasal komputer kitai ti makin sari makin berat sereta lubah taja pen RAM iya besai. Nyadi RAM ti besai ukai jamin ngasuh komputer kitai laju. Komputer mega baka kereta kitai ka di servis sereta dijada kelebih agi ba Registry sereta iya empu performance nggau speed. Siti kebuah ti tau ngasuh pengelubah komputer kitai ianya bisi virus dalam komputer labanti nadai kala discan enggau antivirus kita enda kala diupdate. Kelimpah arinya enti komputer kitai kelau mayuh virus sereta meri siti fungsi supper hidden iya tau ngujongka System Registry kitai corrupt sereta enda ulih befungsi manah. Nya tau ngujongka komputer kitai lenyau sekeda tools ba Folder tauka betambah file/key kelebih agi dalam system 32 dalam windows ba Windows XP.

Dalam pekara tu kena kitai maintance komputer kitai ari segi pengelaju iya kitai tau ngena sekeda software ti bisi ulih kitai download free ari internet. Tiga iti software ti tau dikena kitai kena nyaga performance komputer kitai ianya software ti bisi di sediaka Uniblue Seedup MyPC3, Registry Booster enggau CCleaner. Tiga iti tu ulih mantu kita Repair sereta Defrag Registry komputer kita. Cuma ditu aku madahka pemacha mayuh ngarapka kita ulih Update Antivirus sereta Scan komputer kita awakka ulih clean virus dalam komputer kita. Enti kita nguji 3 iti software tu kita ulih meda komputer kita bisi betambah ari segi performance iya. Pia mega ngagai kita ti bisi penemu mimit dalam komputer tau nukar ia empu value ngena Registry Editor. Kena muka Registry Editor kita tau naip REGEDIT dalam fungsi RUN dalam komputer kitai. Klik START, dah nya klik RUN, udah pansut RUN, taip REGEDIT. Udah iya tebuka kita ka meda ia empu mayuh fungsi dalam nya ti ulih kita ngaduka iya empu Registry iya. Ngagai iya ti baru mesti beati-ati, minta penemu ari orang bukai ti nemu agi. Kelimpah ari nya kita tau ngiga sereta macha pasal perkara tu ari internet. SELAMAT MENCUBA...

Cerita Menyadi Ari Tanah Malaya....

Aku mega tu tadi udah dikirumka menyadi aku ti nyadi Cif Inspektor Polis ba Rembau Negeri Sembilan, gambar sida menyanak ti bisi enggau bala polis dia ngulu pengerami Hari Keluarga ngagai siti tempat pusat bekelah ba Chamang, Daerah Bentong, Pahang. Nitihka dipadahka iya, maya tu tadi mayuh bala polis dia sereta bala diri sebilik bisi ngulu pengawa tu. Kira ke bekelah meh sida tu. Pengawa tu tadi diintu alam pengelama 3 ari. Enti nitihka gambar ti dikirumka iya, rindu amai bala sida peda aku, peda bala anak iya tengah besantai mandi ba ari wong nya. Ba penemu aku empu manah pengawa tu, laban kena ngelantang ka ati bala polis kita ti udah lelak bejalai ka pengawa tiap ari ulih ngelimpangka diri begulai enggau bala diri sebilik. Ok, Manah nya.

















Nya iya bala sida Kristy, Matius enggau Christian Larry tengah baka ranggap enggau getar-getar mandi ai chelap.....

PEMUJUR PRA SEKOLAH BA MENUA KAMI.

Udah 2 bulan bekau ti dipenyadi ulih Menteri Pelajar Menua Malaysia merangkap Sapit Menteri Besai Menua Malaysia, Pra Sekula Rumah Panjai Kampung Sapak ba menua kami di Sapak din udah bejalai enggau mujur. Ba Pra tu bisi 15 iko nembiak kami serumah ti belajar dia. Bisi pemanah amat pra tu dibuka ba menua kami awakka meri peluang ti manah gi ngagai bala nembiak mit ba menua kami nemu reti guna pelajar sekula. Sebedau tu, bala kami serumah tepaksa nganjung anak sida belajar pra ba sekula SK Pantu. Laban penanggul jauh ari pasar sereta jalai ti enda tentu manah, ngujong ka bala nembiak tu semina ulih dianjung kia 2 tauka 3 kali seminggu aja. Udah bekau pra ti nyadi ba menua kami, bala apai indai cukup gaga ati laban bala anak sida ulih belajar sereta ngagai pra nya tiap ari. Nyadi pengajar ti ngajar dia pen kami serumah empu ianya Agnes Langi, sereta PPM ianya Suzie. Arapka seduai ulih ngaduka nembiak dia enggau manah sereta ulih nemujurka nembiak dia nyadi orang ti beguna sereta menyana ke jemah ila.

Pengerami Nutup Gawai 2010

Kena ke 09.07.2010, sekula kami bisi Serumpu Malam Nutup Gawai ba Dewan Seri Begunan dalam sekula kami empu. Malam tu tadi ti nyadi tetamu ti bisi ngulu pengawa tu tadi ianya Tuan Pengetua kami empu sereta bala kaban cikgu ari bansa bukai sereta bala bala anak bini sida enggau bala Exco PIBG SMK Melugu. Maya tu tadi kelimpah ari pengawa makai bisi mega pengawa bukai baka lagu pemerindang ari bala ti bisi datai. Ba jako iya Tuan Pengetua madah sereta pengawa tu terus digaga ba taun ti bukai kena ngeratka kaut antara bala pengajar enggau diri sebilik.

Pia mega kena ke 16.07.2010, aku mega bisi ngulu pengerami nutup gawai ti diintu bala pengajar SMK ST. Luke. Nyadi rambau tu tadi mayuh bala cikgu ti bisi datai, nda kira ari sekula dia empu enggau bala pengajar ari sekula bukai.Nyadi ba maya tu aku meri besai terima kasih ngagai bala kaban aku ba sekula nya laban ti udah ngangauka aku sereta berami beperindang lebuh maya nya

Begulai, Betemu Baru Enggau Kaban Lama....

Nyadi maya ti ngintu pengerami muka prasekolah rumah panjai kami oleh Sapit Menteri Besai Menua Malaysia tu tadi mega bisi bendar pengingat ba kami laban aku ulih betemu berandau sereta begulai enggau bala kaban maya ti sekula ba SMK Simanggang taun 1992 - 1993 suba. Maya tu tadi aku bisi betemu sereta begambar pengingat begulai enggau kaban aku ianya baka Cikgu Gikbert, Cikgu Teresa, Cikgu Gloria sereta siko kaban kami ti udah nyadi pemesai polis ianya ASP Alexson. Maya nya mega kami mega bisi betemu enggau bala pengajar ti udah ngajar kami suba. Nyadi ngenangka pengingat baka aku empu, Cikgu Gilbert enggau Cikgu Teresa sama kelas maya Form 6 ba Simanggang suba ianya kelas 6 Atas TG. Nyadi kediatu mayuh kaban sereta geng sekula kelia udah mujur dalam pelajar sereta pengidup sida... Mayuh ti udah nyadi pengajar sereta pemesai bukai ba perintah tauka kompeni.... Nyadi ngarika kami ti bisi datai mayanya, aku ngarika bala kami meri selamat mujur dalam kerja sereta dalam ruang bilik kita kelebih agi ngagai bala kaban ari kelas 6 Atas TG enggau 6 Atas ML enggau KN maya taun 1992 - 1993 ba SMK Simanggang suba. Nama-nama berita tauka ka nyadi member ba blog aku tau masuk kia, awakka kitai ulih berandau..... Bye...

Ari kanan: Cikgu Gilbert, ASP Alexson, Aku Empu(Penulis), Cikgu Teresa, Cikgu Gloria, Cik Bibi(Ex-student aku ba SMK Melugu suba) tengah possing udah lepas ngambat penatai TPM maya nya.




Nya iya Cikgu Teresa(baju chelum rock) tengah nganti signal mai bala pengajar bukai ka terjun papan anjal ba jambatan maya ti mandi sungai ba menua kami.... lubah umbau !!!!..

Malam Ngiling Tikai Gawai Dayak 2010 Kpg. Sapak.

Kena ka lemai 25.06.2010 tu tadi 3 iko tuai rumah ba menua kami di Kpg. Sapak ianya Tr, Sadut. Tr.Cr. Ajon sereta Tr. Udin udah ngatur Malam Ngiling Tikai Gawai Dayak 2010. Serumba enggau tu mega kami lalu ngatur pemgerami begulai enggau bala pemesai sereta rayat ngelingi menua kami kena ngerami PraSekolah Rumah Panjai Kpg. Sapak mega. Nyadi pengerami Ngiling Tikai lemainya diulu mayuh bala ti bisi datai kelebih agi bala pengajar sereta bala raban rumah panjai ti ngimbai rumah panjai kami. Nyadi pemesai ti dipaduka Ngiling Tikai lemainya ianya Tuan PPD Daerah Sri Aman ianya En. Walter Lamat Kiyai.

Pengerami lemainya mega bisi diperindang ngena lagu sponsor live band. Mayuh ga lagu sponsor malam nya diterima bala kami. Nyadi pia mega bala ti datai malamnya cukup spoting nadai apa nama, sama andal ati belagu, berami, sereta betanda enggau pangan diri. Pia mega pengawa tu tadi meri peluang bala apai indai begulai enggau bala pengajar ti bisi datai sereta bemalam ba rumah sida.

Nyadi aku ngarika bala tuai rumah kami meri besai ngagai tulong, sukong sereta pemanah kita maya kitai ti begulai ba rumah kami. Nyadi dibaruh tu sekeda ari gambar ti bisi diambi aku baka ke lemai enggau malamnya...

Tuan PPD bisi mega belagu merindang mensia mayuh ti bisi datai malamnya ngena lagu iya..

Tuan Yusuf bisi mega merindang bala peninga enggau lagu iya: Adong Belalai....

Bala mensia mayuh ti bisi datai ngulu pengerami baka ti malamnya...

Kaban aku Cikgu Gilbert benung megai dagu nganti turn lagu iya......relax ucak...sabar jak.

Bala kami tengah berami sereta meda bala sida tengah kiruh ngaduka pengawa Ngiling Tikai malamnya...

PraSekolah Kampung Sapak, Pantu Dibuka Oleh Sapit Menteri Besai Menua Malaysia.

Kena ke 26.06.2010, Sapit Menteri Besai Malaysia ianya YAB Tan Sri Dato Sri Haji Muhyiddin Bin Haji Mohd. Yassin, merangkap Menteri Pelajar udah datai ke menua kami di Kampung Sapak, Pantu laban muka Prasekolah Rumah Panjai ba menua kami. Nyadi Prasekolah kami tu siti ari prasekolah rumah panjai menua pesisir ti ke terubah iya ba menua Malaysia. Penatai Sapit Menteri Besai tu ianya siti ari langgur perintah muka sekali 4 iti prasekolah rumah panjai di Sarawak. Kelimpah ari rumah panjai kami ba Kpg. Sapak ditu bisi 3 iti da agi prasekolah digaga ianya ba Rumah Panjai Long Latei, Baram, Prasekolah Rumah Panjai Lubin, enggau Rumah Panjai Amit di Sbauh, Bintulu.


Nyadi nitih ka langgur pintah arinya, pengajar ti ngajar ba Prasekolah tu ianya ari rumah panjai kami empu ianya, Cikgu Agnes Langi sereta pembantu iya ianya PPM ianya Suzie Lim.
Maya ti muka pengerami tu tadi mayuh bala pemesai bukai ti datai temasuk ADUN kami ditu, sereta bala YB bukai ari Sarawak, tambah mega pemesai ari Opis Pelajar ari Kuala Lumpur, Kuching sereta bala PPD Sri Aman, semua bala pengajar Zon Pantu begulai enggau pengajar SK Pantu, bala pengajar bukai sereta bala nembiak rumah panjai genturung ngimbai Pantu. Bala sida tu tadi bisi ke udah datai dulu sereta bemalam enggau orang rumah panjai kena ke 25.06.2010 tu tadi.


Nyadi aku ngarika kami serumah kelebih agi Rh. Sadut, Sapak, Pantu meri besai terima kasih atas sokong semua bala ti bisi datai 2 arinya. Pia mega kami serumah minta ampun enti sema bisi kurang ba sambut sereta basa kami. Arapka kitai terus begulai ba pengawa ti bukai. Terima Kasih !.

SELEKA DUA ARI AKU........

Salam ngagau semua pemaca. Nyadi udah setaun lebih aku tauka kita begulai ba blog aku tu. Nyadi ke sekali tu aku meri besai terima kasih ngagai kita sebala, kitai sebuat laban ti udah meri sokong sereta buah runding ti beguna kena ngaduka blog aku tu. Sekali agi, aku madahka kitai semua, blog aku tu kena kitai berandau pasal berita ti sempat aku empu ambi, kelebih agi pasal cerita ti nyadi ba genturung menua tauka tempat alai aku gawa sereta begulai enggau batang kenang sereta tips pasal komputer sereta dunya pasal IT kemaya ari tu. Nyadi dalam blog aku tu enda tau sekali-kali kitai bejurai pasal pendiau sereta gaya idup orang ti tau ngasuh mai pemalu sereta penyai ngagai orang nya. Pia mega enda tau bejurai sereta bekenang pasal politik kemaya ari tu. Cukup meh wai kitai bekenang pasal utai ti manah sereta ulih buka mata kita kena nemaju sereta ngemansangka pendiau diri.

Dalam dunya IT sereta dalam bidang komputer, aku meri besai terima kasih ngagai kita semua ti udah bulih penemu mimit ari aku. Ngagai iya ti enda ulih betemu mua enggau aku, aku nemu kita mayuh emel sereta chatting enggau aku sekali ka ngena facebook tauka twitter. Iya ti ulih betemu, mayuh mega ti nanya sereta nganjung komputer ngagai aku empu. Nyadi ngena penemu ti mimit setakat tu aku udah ulih mantu bala kita sekalika betemu mua tauka ngena cara bukai. Terima kasih mayuh ka bala kita. Nyadi ngagai bala ti bedau nerima emel aku, minta ampun laban sekumbang ti cuti tu tadi aku diau di menua sereta lama enda online, pia mega aku nganjung secara beransur-ansur laban bisi sekeda bahan aku gigi dulu. Kediatu aku bisi nerima 1057 emel pasal komputer ari kita. Kelebih agi ari nembiak kitai iban ti benung belajar ba Universiti sereta bala iya ti kereja perintah. Terima kasih kaban......

Pia mega ba tu aku meri besai ngagai My Family laban ti udah sama betulung nulong aku buka tutup komputer, baka anak tuai aku Keith Maxskey Tegong (12 taun) sereta anak kedua Shannon Vanley Luli (9 taun). Pia mega ngagai my loving wife Thodesia Kaja, pengerindu tetap meruan sereta baka selama,pia anak biak aku ti nyau semakin gerai diatu Dylon Maxkray Bana ( 4 taun). Arapka petara terus meri pemujur dalam pengidup nuan anak.... Daddy tetap besampi nuan terus mujur dalam pengidup nuan.....

Ke pengujung tu sekali tu ba artikel komputer di baruhnya, aku bisi nulis 3 iti artikel kena kita ngaduka 3 iti masalah kediatu ti selalu nyadi masalah ba komputer kita maya diatu, tambah mega mayuh bala kita nanya aku pasal pekara tu. Nyadi enti dalam emel kita enda nerima balas, kita tau macha dalam artikel di baruh tu.... Nyadi ngagai kita ti bedau sereta ka macha cerita sereta artikel aku ia ti lama ba taun tu tauka ba taun 2009 suba, kita tau klik semua berita nya ba bagian artikel tauka informasi ti bisi tanda taun sereta nombor artikek ti bisi ba baruh profile aku.

Terima Kasih....

CARA KENA NGEMULAIKAN FAIL WORD, EXCEL TAUKA FAIL BUKA TI LENYAU / KENA HIDDEN

Diatu mayuh udah nyadi nitihka utai diasai aku empu tauka kita ianya fail kita ti ditaip ngena Microsoft Word lenyau tauka nadai dipeda agi udah bekau kita Scan komputer kita ngena program Antivirus sekalika dalam hard disk tauka pendrive kita. Kes beketu ukai tau semina nyadi ba fail word aja, tang tau mega nyadi ba fail ba format jeni bukai baka Mocrosot Excell. Nyadi kena selamat agi tauka kena nyelamatka fail kita manah agi kita nyimpan semua fail kita dalam Folder ti diRENAME kita nitihka peneka ati, awakka nyamai kitai ngiga fail-fail kita ti lenyau tauka kena Hidden.

Kebuah fail-fail tu lenyau ianya laban kena detect virus kuat ti ngena function Super Hidden ngagai fail kita. Anang irau, sebenar fail-fail kita nadai lenyau, cuma kena lalai ka aja. Bisi cara mudah kena meda tauka ngemulaika fail kitanya ianya;

• Kena software ti ulih extract tauka compress fail kita. Tapi kita mesti udah engkah fail-fail kita dalam folder baka WinZip tauka WinRar.
• Ngena fungsi taip fail dalam NotePad
• Ngena fungsi ba Command Prompt

a). Ngena WinZip tauka WinRar

1. Cara Ngena WinZip tauka WinRar siti ari cara kena ngemulaika fail kita. Ngena cara tu kita cuma klik kanan ba mouse kita ba folder ti bisi fail kita ti lenyau. Udahnya klik ba "Add file to Winzip tauka WinRar".
2. Udah kemas proses iya peda dalam fail ti udah kena compress tadi, kita ka meda failnya bisi dia. Open fail nya tadi udahnya mestika Save As baru fail kita nya sereta simpan dalam Folder bukai awakka kita sentiasa ulih muka ia.
3. Cuma kena ngena tu kita mesti install program WinZip tauka WinRar dalam komputer kita

b). Cara Ngena Taip Notepad

1. Terubah ia buka program Notepad dalam komputer kita.(Klik Start - All Programs - Accessories - Notepad)
2. Udahnya dalam Notepad tadi, tuliska code tu: attrib -s -h
3. Udah kemas taip code ringkas tadi, Save As fail tadi ngena nama faillenyau.bat (File - Save As - faillenyau.bat - Save). Enti sema fail tadi lenyau dalam Pendrive, Save kita dalam Pendrive, pia mega dalam drive bukai.
4. Udahya buka(double-click),giga sereta klik nama faillenyau.bat tadi dalam pendrive kita.
5. Udah kemas buka, copy sereta paste nama faillenyau.bat tadi ke dalam folder kita ti nyimpan fail kita ti lenyau. Double click fail tadi, udahnya kita ka meda fail ti lenyau tadi bisi ayan.

c).Ngena Command Prompt

1. Ngena cara tu kita semina klik Run ba start programs.
2. Udahnya taip: cmd
3. Udahnya command prompt keluar. Taipka: attrib /?
4. Udahnya kita ka meda mayuh arahan dia, tang ngagai bagi fail kita ti lenyau, kita semina perlu naip code beketu dalam Drive C:\> tauka Drive D:\> tauka dalam drive bukai ti bisi ngundan fail kita ti lenyau. Taipka: attrib -s -h *.* /S/D
5. Udah kemasnya, Refresh komputer kita tauka semua drive tadi. Kita ka meda fail kita ti kena hidden tauka lenyau tadi ka ayan baru.

Selamat Mencuba....

CARA KENA NGEMULAIKA PRINTER TI SPOOLER/DIHIDDEN

Penanggul Komputer:

Siti penanggul ba komputer kitai ianya nda ulih print laban printer nda bisi ayan tauka nadai ayan ba Control Panel meskipun kitai udah install driver ia. Enti maya kitai print, bisi keluar dialog box ti madahka enda ulih print laban Printer kitai Spooler. Kebuah penanggul tu nyadi ianya laban sistem udah kena kacau virus tauka hardware kitai nda support sistem laban printer udah kena offline.

Nyadi enti penanggul tu nyadi, kena meh cara dibaruh tu kena ngaduka ia;

1. Buka Control Panel, udahnya klik Network Setup Wizard.
2. Klik button NEXT, udah "Welcome to Network Setup Wizard" keluar – Klik Next(titihka arahan dalam nya)
3. Pilih Other, klik next udahnya pilih jenis wizard ti bisi dalam kotak , titihka nitih ia ti sesuai ba network komputer kita.
4. Udah tembu proses setup anang lupa klik TURN ON printer ti dikena kitai sekalika ia sharing tauka enda.
5. Udah embih step di atas dikena kita peda tauka check ba Control Panel peda ba Fax enggau Printer kita udah ayan sereta ulih kena kita print.

CARA MENGATASI MASALAH TIDAK BOLEH DOUBLE-CLICK DALAM KOMPUTER ANDA..

Mengapa saya tak boleh double-click pada partition dalam komputer? Contohnya, bila saya nak buka partition C, akan keluar dialog “Open With”.

Penerangan:Masalah ini biasanya berlaku setelah jangkitan virus. Virus biasanya akan datang bersama fail autorun.inf yang berfungsi untuk melancarkan virus tersebut apabila anda double-click pada partition. Apabila anda scan komputer dengan antivirus, ia akan membuang virus ini. Namun sesetengah antivirus tidak membuang fail autorun.inf, dan membiarkan ia tertinggal di dalam partition. Sebab itulah anda tak boleh double-click pada partition anda walaupun setelah virus dibuang.

Penyelesaian:Terlebih dahulu, pastikan virus di dalam komputer anda telah dibuang.

1. Gunakanperisian antivirus seperti Avira, AVG, Kaspersky dan lain-lain yang baik.
2. Pada Windows Explorer, pergi kepada menu Tools > Folder Options.
3. Pada tab View,pastikan: Pilihan berada pada “Show hidden files and folders” Kotak “Hide protected operating system files (Recommended)” dikosongkan.
4. Selepas itu pergi ke My Computer, klik butang Search di Toolbar dengan setting Advance,taipkan autorun.inf, klik search, selepas autorun dijumpai, DELETE kan system/filetersebut tersebut dalam Local Disk C\: dan Local Disk D\: sahaja.
5. Restart komputer anda.

PRA-SEKOLAH KAMPUNG SAPAK,PANTU SIAP.!!!!!

Salah satu kemudahan luar bandar yang cukup dirasai di kampung kami ialah telah tertubuhnya Pra-Sekolah untuk penduduk luar bandar yang merupakan salah satu perintis di Negeri Sarawak seperti yang telah diumumkan oleh Timbalan Perdana Menteri selaku Menteri Pelajaran, Y.A.B Tan Sri Muhyiddin Bin Haji Mohd. Yassin baru-baru ini. Pra-Sekolah ini merupaka antara salah satu alternatif kerajaan untuk mamajukan dan menaiktaraf kemudahan pendidikan di luar bandar bermula dari pra sekolah.

Projek menyiapkan pra sekolah ini telah dimula pada pertengahan bulan Mac dan telah siap

sepenuhnya pada pertengahan Mei lalu. Bangunannya mampu menempatkan dua buah kelas dan dau bilik untuk kakitangan dan pengajar. Lokasinya yang strategik di persimpangan 3 kampung menjadikanya agak sesuai. Dengan kemudahan ini, maka ianya dapat menampung sekitar 10 - 15 bakal pelajar di kawasan kampung. Tambahan pula dengan tertubuhnya pra-sekolah ini maka tidak payahlah ibubapa pelajar nanti menghantar anak mereka ke pra di SK Pantu yang lokasinya agak jauh dan melalui jalan balak yang agak merbahaya terutama sekali pada musim hujan.

Majlis Perasmian bangunan ini nanti akan dilakukan oleh Timbalan Perdana Menteri Malaysia selaku Menteri Pelajaran iaitu Y.A.B Tan Sri Muhyiddin Bin Haji Mohd. Yassin pada 26 Jun 2010 sekitar jam 3 petang ditapak pra-sekolah ini. Dengan ini penduduk kampung yang ditemui berasa sungguh gembira kerana bukan setakat dapat merasmikan bangunan ini, malah bertemu dengan beliau sebagai Timbalan Perdan Menteri. Setakat 15 Jun, penduduk kampung telah membuat persiapan yang rapi dan telah menyambut beberapa lawatan

yang telah dilakukan oleh pegawai-pegawai dari Pejabat Pelajaran Daerah(PPD), Jabatan Pelajaran

Negeri Sarawak(JPNS) malah dari Kementerian Pelajaran Malaysia(KPM) untuk memantau projek dan persiapan yang akan dilakukan bersama penduduk kampung. Di sini saya sebagai pendidik dan berasal dari kampung ini berasa amat gembira dengan tertubuhnya pra-sekolah ini.

Gambar di atas menunjukkan beberapa pegawai dari KPM. JPNS dan PPD Sri Aman sedang menikmati jamuan, berbincang dan mengatur persiapan dengan para penduduk kampung untuk upacara pembukaan yang akan dilakukan oleh Menteri Pelajaran Malaysia pada 26 Jun 2010 nanti.

PENGERAMI GAWAI 2010 BA MENUA..

Gawai Dayak ianya sebengkah pengerami ti sebaka enggau pengerami bansa bukai ti diintu cukup penuh reti kelebih agi ngagai bansa kitai iban. Ngena pengerami tu kitai ulih begulai sejalai, bebuti besendi enggau pangan diri, kelebih agi ngagai kitai ti diau di rumah panjai. Nyadi ngena maya tu meh kitai ulih begulai diri sebilik, kaban belayan engau sekayu rumah begempuru sereta begulai berami ngulu pangan diri. Ngagai kitai ti diau di negeri tauka ia ti gawa ngagai menua bukai nda ngira kitai gawa perintah, kompeni tauka pengawa bukai, tu meh maya kitai pulai ke menua sereta betemu enggau bala di menua, kelebih agi apai indai kitai empu. Di menua kitai di Sarawak tu siti ari "trend", maya gawai tauka krismas mayuh bala kitai ngemulaika diri ke menua. Nyadi maya gawai tu meh kitai berami sereta begusung ngagai diri sama diri. Maya tu mega kitai bebuti enggau betundi enggau pangan diri. Nyadi maya tu meh kitai ulih muai semua jako lama sereta laya lama, awakka tundi kitai tau manah sereta lantang ati maya berami. Laban maya tu kitai bisi beirupka ai bisa, nyadi arapka kitai tau ulih nyaga ulah diri, ngirup mana sereta betundi manah, awakka pengerami gawai penuh reti ba kitai.

Nyadi di menua kami di Sapak, Pantu, nyauka setiap taun maya gawai tu diintu cukup pengerami ba menua kami. Nda ngira nembiak, orang tuai tauka bala indau lelaki pengawa gawai cukup pengeami diintu kami, kadang-kadang sampai malam tauka dini ari pengerami tu diintu kami. Ia ti udah cukup ngelu sereta nda ulih nitih lalu ngali kediri meh. Sapa ti kuat gi injin sereta cukup "four wheel" ngansarka kaki ulih ga ngembihka adan. Iya ti manah ba menua kami tu ianya, taja pen sekali ngengkah bejalai sereta betundi tubuh mensia nyauka datai 60 iko, tang nadai kala belaya sereta carut enggau pangan diri maya betundi gawai. Pia mega bala nembiak rebak baru diatu cukup manah ulah ba menua kami leboh ti berami begulai enggau orang tuai... TAHNIAH SAPAK....... Nyadi arapka baka taun-taun ti ka datai pengerami baka tu tau ulih diintu kitai enggau manah ulih kitai.....ngena cukup pengerami. Nyadi di baruh tu sekeda gambar ti ulih diambi aku maya pala agi manah.....gambar bukai nda ulih laban nyau lain injin wai.... maya nya nda tentu ingat ka ngambi gambar agi laban kaki nyau gatal ga ka ngansarka diri.... Arapka betemu ba taun 2011......

PENANGGUL SERETA CHARA NGADUKA ENGGAU NYAGA LAPTOP & DESKTOP KITAI..

Ka banding kitai siko ari End User ti ngena komputer kitai kadang-kadang kitai enda nemu tauka sigi enggai berati ka cara kena nyaga komputer. Udah lepas meli, kitai selalu ka ngena ia aja ti ngujungka enti sema bisi penanggul dalam komputer kitai lalu terus anjung ngagai kedai kena ngaga ia. Dibaruh tu lagi aku ka meri tip kena kitai nyaga pengetan sereta pengelikun komputer kitai. Aku meri ditu cara nyaga sereta kena nemu penanggul Desktop enggau Laptop kitai.

a). PENANGGUL SERETA CHARA NGADUKA ENGGAU NYAGA LAPTOP KITAI;
Laptop kitai jarang nadai penanggul bukai laban komponen ia semua build-in begulai enggau Motherboard. Nya kebuah enti bisi penanggul, pengerusak mayuh nyadi dalam motherboard. Nya kebuah ba Laptop ia ti selalu rusak ianya motherboard. Di antara tanda-tanda motherboard kitai rusak ianya;

i). Enggai detect hard disk maya kitai ngidupka komputer kitai tauka enggai idup maya kitai nekan button On ba Laptop kitai meskipun kitai ngachukka sereta on Charger kitai.
Pengerosak : Retinya Power Supply Connector kitai ti begulai enggau Motherboard anggus tauka jai. Enti sema Desktop kitai ulih nukar sereta meli Power Supply baru. Tang ba Laptop kitai enda ulih nukar ia aja, tang tepaksa meli Motherboard baru. Kebuah pia laban dalam motherboard bisi Bus Sistem ti bisi wayar alus ti tau anggus sereta jai mega. Dalam pekara tu Hard disk kitai jarang jai tapi selalu ia mother board, kecuali maya kitai ka Format komputer, tang iya enggai detect hard disk, baru tanda ia jai hard disk. Biasanya enti jai Motherboard, kitai tepaksa meli baru, sereta rega iya enda kurang ari RM700.
Chara nyaga: Siti chara nyaga Laptop kitai ianya kawal penganggat dalam Laptop kitai. Nyadi manah gi enti kitai ngena Laptop kitai di rumah, kena meh Colling Pad ba baruh Laptop kitai, lebih agi enti sema kitai ngena ia dalam timpoh ti lama. Kebuah pia laban ia ulih nginsap penganggat dalam Laptop. Diatu Colling Pad dijual enggau rega enda datai RM40, nyadi nadai rugi kitai meli ia ari ti ngaga ia enggau rega ti besai. Enti di opis ti bisi air-cond kitai enda ibuh ngena iya laban suhu dalam iya ulih dikawal penganggat ia. Manah gi enti enda dikena, OFF laptop kitai anang biarka ia idup kelalu lama enti enda dikena. Pia mega aku mesan kitai anang engkah Laptop kitai dalam kereta enti ari anggat sereta anang terus masang komputer kitai enti iya udah lama anggat dalam kereta. Biar sari dulu sampai ia chelap baru kitai tau ngena iya. Laban enti kelalu anggat enti dipasang tau ngujungka motherboard laptop kitai rosak.

ii). Skrin enda manah grafik tauka baka ti pecah, tang nadai ga dipeda pecah ari luar.
Pengerosak: Dalam kes tu skrin laptop kitai jai tauka pecah. Kebuah pia laban ia skrin laptop kitai kelalu sensitif.
Chara nyaga: Anang mai sereta nyimpan Laptop kitai begulai enggau barang bukai enti maia nyimpan ia.


B). PENANGGUL SERETA CHARA NGADUKA ENGGAU NYAGA DESKTOP KITAI;

Nyadi penanggul dalam Dektop kitai, bisi part ia tau jai mega dalam Laptop kitai. Nyadi bisi sekeda tanda-tanda dibaruh tu tau nyadi ba Laptop kitai. Di antara beberapa penanggul sereta pengerusak enggau cara ka nemu penanggul ia sereta chara nyaga iya diberi aku di baruh tu;

i). Api komputer idup tang nadai gambar keluar di skrin
RAM / Memory gerah tauka kaki ia kamah/kotor .Cabut RAM sereta tuchi kaki kuning dibaruh ia enggau pemadam pensel sereta lap sampai beresi, udah nya pasukka baru ngagai RAM Slot ia. Enti enggai nyadi reti nya RAM jai, tepaksa meli baru RAM.

ii). Komputer kitai bemunyi TIT...TIT...TIT jampat sereta pandak. Komputer idup, tang nadai gambar keluar dalam skrin.
Retinya VGA Card rosak, tauka kaki ia kendur baka RAM tadi. Chara ngadu ia sama baka kitai nyaga RAM di atas tadi.

iii). Komputer kitai bemunyi TIT...(bunyi panjai, terus sereta nadai berenti enti kitai nadai madamka ia.
RAM / Memory rusak. Uji gaga sereta adu ia baka chara (i) tadi. Enti enggai ga nyadi retinya Motherboard jai.

iv). Monitor selalu berubah colour.
Bisi kabel tauka kaki slot nadai dipasang manah begulai enggau VGA Card. Bisi pecah tauka ka jai kabel ti nuju ngagai komputer. Pia mega RGB Monitor kita udah rosak. Retinya tepaksa meli monitor baru.

v). Maya On Komputer keluar tulis ” DISK BOOT FAILURE, INSERT SYSTEM DISK AND PRESS ENTER”.
Retinya sistem dalam hard disk lenyau tauka hard disk rusak. Kena nemu masalah tu, Restart komputer kitai, udahnya peratika maia komputer kitai ka start bisika enda IDE / Hard disk kitai pansut. Tauka tekan button DEL maia ia baru ka start. Peda ba Standard Setting. Peda enti sema bisi IDE / Hard disk pansut, retinya Hard disk nadai jai tang sistem tauka partition ia lanyau. Retinya install OS(Operating System) baru. Enti nadai pansut reti nya Hard disk udah jai. Uji tempap anang kuat atas Hard Disk, ngicaka iya empu motor ka bejalai. Enti ka nyadi udah digaga bekenya, jampat kita Backup data/dokumen kitai laban nya nunjukka hard disk kita nyauka jai sereta enda tan agi. sereta tepaksa kitai meli baru. Enti enggai, tepaksa kita meli Hard disk baru.

vi). Maia ngidupka komputer selalu minta kitai nekan F1 baru ka start
Retinya Batery BIOS udah jai / rusak enda ulih ngingatka BIOS Program agi baka jam enggau ari bulan. Uji beli battery baru kena nganti baterry BIOS. Udahnya aduka setting jam sereta ari bulan kita ngagai ia ti betul. Udahnya padamka komputer kita, cabut Power Kabel Listrik (Power LD) ari Stop Kontak ke komputer. Biar komputer kita padam lebih kurang 10 saat. Udahnya lekatka baru kabel tadi, idupka baru komputer kita, enti sema ia nadai kita nekanka F1 retinya komputer kita udah manah. Enti enggai, sah part nya ba bagian Mother board udah jai, tang komputer kita ulih kena, Cuma ka nekanka F1 belama maia ngidupka ia.

vii). Komputer enggai idup maia kitai nekanka karan tauka maia kitai nekanka Power Button.
Dalam tu retinya kotak Power Supply udah rusak sereta kita tepaksa meli baru.

Di atas tadi ianya sekeda ari penanggul sereta pengerusak ti selalu nyadi ba Laptop sereta Desktop kitai. Nyadi arapka ia tau nyadika panduan kita maia ti beratika penanggul sereta pengerusak komputer kita. Kelimpah arinya enti bisi penanggul bukai kita tau nanya ngagai aku ba e-mel aku. Arapka ia ulih mantu kita, kelebih agi ngagai bala bansa kitai iban ti baruka ngena komputer tauka ka belajar ngaduka komputer kita empu.

Terima Kasih..