"SELAMAT DATANG KE BLOG INI. GUNAKANLAH IANYA UNTUK TUJUAN BERKONGSI PENGETAHUAN MEMBINA DAN POSITIF. ADALAH TIDAK DIBENARKAN SAMA SEKALI MENGGUNAKAN BLOG INI UNTUK TUJUAN MENGKRITIK DAN MENFITNAH MANA-MANA PIHAK SERTA MENYEBARKAN BERITA PALSU ATAU YANG BOLEH MENGAIBKAN DAN MEMALUKAN PIHAK-PIHAK TERTENTU. BEGITU JUGA PERKARA-PERKARA YANG BERKAITAN DENGAN ISU-ISU POLITIK TIDAK DIBENARKAN SAMA SEKALI DIBINCANGKAN DALAM BLOG INI."

06 November 2009

JURAI KA BATANG KENANG

Batang runding ke sekali tu ianya bekenangka siti rambu pasal kati gaya pengidup bansa kitai iban kemaya ari tu kelalu ka nitihka gaya pengidup tit tau ngasuh ngujungka kitai tau tinggal ari urang bukai. Asai aku nadai salah nti kitai ka nitihka chara urang enti sema ia tau mai chunto ti manah ngagai bansa kitai. Kenang ke sekali tu lebih agi dipejuraika bansa kitai ba sekeda menua ti diau mendam di rumah panjai. Diatu mayuh macham pemansang ti udah diberi perintah ngagai kitai, mayuh tulung diudah diberi kelebih agi pasal tinjau ti besekulaka bala anak kitai. Ba peda mata aku kitai sigi nemu reti ti ka besekulaka anak tang kadang-kadang nadai tinjau bekeni cara nyuruh sida maju dalam pelajar.

Dalam dunya kemaya ari tu ranjau jalai maya ti besekulaka bala nembiak enda baka kelia. Kelia teresak penemu, berita, cherita enggau dunya pemadah enda baka ke diatu. Asai aku maya aku ti besekula kelia, semina ulih ninga radio sereta ulih meda TV 1, TV2 enggau TV3 ngena TV chelum putih, nya pen ngena bateri cas. Kediatu mayuh pekara ti ulih dipeda bala anak kitai ti benung sekula laban kuasa karan ti ulih datai di rumah panjai. Serumba enggaunya dia bala nembiak ulih bepedaka sereta ninga macham berita, pemerindang,gambar sereta mayuh macham ari TV, radio sereta jenis pemadah bukai. Ari pemansang ti nyadi tu mayuh macham penemu tit au diulih kitai, Cuma kitai kadang-kadang enda nemu iya manah tauka enda.

Ari peda gaya aku, kitai di rumah panjai kadang-kadang nitih terus semua utai tu laban ti enggai alah laban urang bukai. Bisi siti gaya, apai indai di rumah panjai te gagit ngayanka anak sida baru Primary 6 bisi talipon bincing kediri empu. Kitai kadang-kadang enda nemu kitai meda sida bekenya ketegal tuju ti manah taukaka ka nunjuk kitai bisi utai ka urang. Nyadi ketegal kelalu mayuh macham perkara tu ti enda ditemu kitai manah tauka jai ngujungka kitai tepesuk ba jalai ti salah. Nyadi siti pekara ti dipeda nyata nyadi ba bansa kitai ianya kelalu alah laban pengerindu sereta pemerindang. Retinya kelaluka ngerundingka pengerami. Suah bendar kitai ninga orang bejako, “Bendar tu ila betanda sereta ngirup maya melah pinag sanu….”. Pengerindang ati tu ukai semina nyadi ba bala nembiak kemaya ari tu malah terus bejangkit ngagai bala urang tuai mega. Kadang-kadang kitai meda dia bala nembiak berami besalin ka ai bisa, dia mega urang tuai sereta apai indai sida.

Kediatu kitai kelalu mayuh tepejuh limpang laban pengawa kitai iban ti kelalu beirupka ai bisa, nadai milih ari sereta tempat. Kitai ke apai indai sebenarnya nda sedar ulah sereta perangai kitai ti bansanya tau ngujungka anak kitai tepikir nya ulah kitai, enti kurang baja ngujungka anak kitai beperangai bansanya mega. Ia ti teruk agi sida bepun ngereja pengawanya rambau ti agi sekula, diatu Primary 6 bisi sekeda sida udah belajar nginsap belalai belah babas di rumah panjai maya ti mandi tengah ari tauka ba pun lemai ke sungai. Bisi maya kitai negur sida, senang aja saut sida, “Nda apai aku nda nyanu…..”
Nyadi pekara tibansa tu ulih nyadi penyakit besai enti nda diperatika enggau manah.
Pia mega ba sekula, penyalah ti mayuh dikereja bala nembiak ke diatu enda kira di negeri tauka di rumah panjai ianya penyalah nginsap enggau ngirup. Selalu kitai meda nembiak ti sama ngereja pengawanya sampai empat lima kali sida ngereja. Empat lima kali mega apai indai sida datai ke sekula, enti sema sida dipinta datai ke sekula ketegal penyalah anak sida. Ti ngiranka ati selalu sida madah anak sida enda alah ajar agi. Nti diajar ngelaban ko sida. Ba lansa tu uji kitai merati bekeni pendiau kitai ke apai indai dulu, bekeni pendiau anak kitai, bekeni cara ia begulai enggau urang sereta kini ke penunga sida iya enti sema sida madah ka kitai ke apai indai sida ka mindah.

Siti cara kitaika ngemujurka anak sereta ngeransing sida dalam sekula ianya nyuruh ian bechuntoka kitai ke apai indai empu. Chunto ti au diberi kitai ngagai sida ianya chunto ia ti manah. Uji dampih enggau anak kita begulai sereta nguji anggap sida kadang-kadang baka kaban sida empu. Tanya masalah sida, uji berandau cara manah sereta tunjukka teladan ti manah ngagai sida. Ia ti manah biar kitai berengkah ngena pekara ti bansa tu ngagai sida stat sida agi mit, anang makin sida besai kitai makin jauh agi ari sida. Beri jako peransang ngagai sida bechunto ka urang ti udah mujur dalam pengidup. Ngajar anak ukai semina ngena cara kasar aja, mayuh macham cara kitai ngajar sida. Ia ti paling manah ianya , mula-mula tunjuk ka chunto sereta ulah kitai ti apai indai ti manah ngagai sida. Ari cara ulah kitai apai indai ti manah tau ngujongka sida ulih bebesaka kitai. Bah enti pendiau kitai nyelai bekeni anak kitai tau bebasaka kitai. Nyadi ngagai bala apai indai ke baru diatu ti diau di rumah panjai ti baru bisi anak 3 tauka 4 taun bedau laun alai kita ngubah diri. Enti sebedau tu kitai ke tiap-tiap ari ngirup, insurka meh, kala nak kitai bedau nemu reti meda ulah kitai. Nti ti manah gi cukup meh maya rami aja kitai ngereja iya, anag sampai meliur ga. Pia mega cara jako, cara ulah sereta cara ulah kitai ke apai indai begulai enggau urang mega ulih meri pengaruh ti besai ngagai anak kitai. Ambika banding pengeregas kitai gawa ulih meri penyiru ngagai sida enti sida meda pemedis kitai ke apai indai begiga ke belanja besekula ke sida.

Nyadi ke simpul iya dalam dunya ti mansang maju enda bebatas tu sama meh kitai berunding. Pekara terubah ti tau ulih ngaga ulah ti manah ngagai bala anak kitai ianya, kitai apai endai empu ngala ulah ti manah awakka anak kitai bebasaka kitai. Ngajar anak ukai semina ngena kaki jari aja, mayuh cara bukai. Anang malu betanya ngagai apai indai ti udah bisi pemujur dalam besekula sereta ngatur pengidup anak sida. Beri jako perangsang ke sida, Uji dampih enggau sida, uji bebuti enggau sida, Tanya pejalai sida sereta beri mayuh agi masa kitai berandau sereta begulai enggau sida maya sida bisi pulai ke rumah ari asrama di sekula. Penyiru sereta pengitok kitai ke sida ulih meri peransang ka sida dalam besekula sereta pengidup.

Nyadi jako tu semina ke kenag aja. Enti sema bisi ke nda nyamai ati, aku minta ampun laban tu kebatang kenang aja ari buah jako aku empu. Ukai ka nyindir sapa-sapa tang arapka kitai sama begempung ati bepegai jari ngangkatka teresak bansa kitai, awakka nda tinggal bedandang umai… awakka nda alah baka ai surut lemai. Sama meh kitai berunding panjai dalam pekara tu. Ia ti dipadahka aku ditu semina mimit aja ke batang kenang. Ba tubuh kitai siko mayuh macam cara kena kitai nyeliahka pekara ti enda manah sereta madah ka cara ti manah. Arapka bansa kitai sama bepadahka pangan diri, anang bingking sereta anag beciping enggau pangan diri.

Nya aja…… Ari Aku…..(Dom Wil: E-mel:- wrson74@gmail.com)