Sembilan bulan indai rerindi ngenatka pemai tubuh diri. Tegal penyayau ke purih diri, sanggup ngadai nyawa janji kitai ada idup ditupi. Maya beranak betaruhka seput nyawa diri, ketegalka deka meda kitai ada ke dunya sama ngembuan seput diri. Ingat anak, kitai ada tau dibalut darah tau dibalut kemi tau dibalut tai, enti enda ari intu jari indai diri. Meri seput ai tusu ari tubuh indai diri.
Nya meh tanda bakani penyiru ke dikembuan ke dikemisi, awakka kitai idup nyadi mensia penuh pemeri. Udah besai kitai diandai, awakka keresa kitai baka enda pungkang nadai. Sanggup apai indai kitai enchadi ngena cebik tanchut dalam tebinsai, asal kitai anak enda dikumbai orang baka ke nadai utai. Maya ke nadai bendar ngerawis nyerungkai, asal kitai anak mujur sekula bisi pemandai.
Amai diatu kitai selalu merati nampai, bisi ga anak enyau putus pengasih layu sulai. Udah nyamai sayap ngerembai, mayuh ke ngelak baka ke ngenyauhka diri ari apai indai. Malu ngaku meda ke gaya kamah, babu bejaku meruyan sebarang utai. Dah lah udah tuai, lalu melampui sebelah utai, nadai rumah likun digaga lalu dilakka kurang pemakai. Lebih agi sinu sampai dianjung ke rumah pengandai tua, baka ke ngasuh ngitung umur nganti pemarai. Sakit lenggit enda diintu diabas kitai, bira kemi semua dibalai. Kitai nyau empeji keji, anang ke megai, negu mayuh enggai.
Ingat anak, maya ada sapa ke ngintu kitai. Enti sema ia jai pun tetap apai indai kitai. Anang anyut laban penyamai sampai kitai muai pugu kitai. Dunya tau bekalih anak, ukai semampai kitai nyamai. Kitai mansang bisi teresak tanah empalai. Diatu kitai neju ke apai indai, udah tuai ila anang ngutuk ga enti anak kitai ga mia ke kitai. Ingat Serga ba baruh tapak jari kaki apai indai. Bakanya kitai ngelak serta ngemediska apai indai, engka bakanya ga Tuhan tau ngajar musin ke utai awakka kitai sama ngasai enda diintu maya tuai...
Follow & Like Page:
=================================
~Aya Kemayang Panas~
Tiada ulasan:
Catat Ulasan