Selamat beujung minggu serta selamat betemu baru. Ari utai ke bisi dipost serta dibantaika aku dua kali ba mua bup sebedau tu, bisi ga bala nanya berapa iti pekara ba aku kelebih agi senentang Teknologi Pemadah (IT). Tu sekeda utai ke bisi ditanya serta dipinta:-
======================================
1. Terubah, ulih ke enda utai ba media rama kitai baka Mua Bup, WhatsApp enggau ke bukai dipeda serta dipantau orang?.
2. Kedua, ka ke enda aku nanga virus ke sida dikena ngena ke orang ke bisi ngachau serta enggai dipeda sida?
3. Ketiga, ulih ke enda CD, VCD tauka DVD ke bisi di "protected" ke enda ulih ayan ba laptop tauka komputa dibuka lalu peda list lagu ia baka suba?. Ka ke nuan nulung aku ngadu?
======================================
Beduduk ari tiga iti tanya nya aku deka nyaut tanya ke bisi dibantaika kita ba aku. Lalu aku deka nerangka mimit pasal kebuah aku nyaut bakanya. Sebedau nya aku minta ampun engka jaku Iban aku enda betusun serta bisi diselit enggau jaku injau ari bansa bukai.
SAUT UNGKUP TANYA LUMOR 1:
======================================
***👉👉👉Semua keresa ke digaga mensia endang mensia ga nemu ngena tauka bekeritukka ia. Baka ke ditanya kita ba aku nya, dia aku madah semua utai ke ditulis, ke ditaip, dikunsi serta dipos kitai ba semua media rama endang ulih dipeda lalu dipantau magang. Diatu mayuh "software" ke bisi ulih dikena ba utai bakanya. Pia mega ke bisi agi penemu ba tikas ke tinggi ba IT sida ulih ngaga kediri ngena "Coding" ke digaga kediri, tebalan agi ngena "Programming Languages" baka C tauka ia ke bukai. Mensia ga ngaga, mensia ga nemu nyidi. Baka bala lutor ke nemu nyidi penyakit mensia meh bala kaban. Salah jaku seleka semina nyawa kitai aja ke enda ulih sidi kitai laban nya endang ungkup Petara ke nentuka umur kitai.
SAUT UNGKUP TANYA LUMOR 2:
======================================
***👉👉👉Ba senentang tu aku deka madah. Maya ke belajar IT suba kami bisi diterangka dua pekara senentang "Etika" & Undang-undang. Ba senentang ngaga virus lalu ka ngena ke orang jarang ga kitai nemu sapa ke ngaga lalu bakani niat tauka tuju ia dikerembaika. Sekali ka sengaja tauka enda sengaja. Enti dipadahka ia tau salah ba undang-undang, ditambah enggau sengaja kitai ka ngena ke orang nadai tuju kebuah. Amai enti kitai ngena ia ka bebalas ke mensia ke ka ngiga buku enggau ruas, nya lebih agi ngagai "Nilai Etika" ko orang. Laban ke ngasaika diri salah, kadang-kadang ke kena diau diri ga laban ia ngasaika diri salah mungkal nanjal. Ti enda ngachau orang, kati ke orang tau deka ngena ke kitai. Nyadi ba saut ka ke enda aku ngaga lalu meri kita, aku endang madah enda ulih laban ia lagi tau masuk dua iti sukut ba peda orang. Ia tau dipeda enda beretika enti aku sepeneka ati meri sampai nyaulka orang virus enggau tuju ia ke enda manah. Kedua lagi ia tau mega ngenusahka kita enti salah guna sampai sengaja bekena ke utai bakatu ngemedis serta ngenusahka orang. Ti ditemu sengaja ia tau mega ngasuh kitai kena undang-undang. Nya kebuah baka siko-siko kitai ke landik bekena ke utai bakatu, ia sigi bisi tuju ga dikena, amai penemu bakatu enda manah dikerembai laban ia tau mai pengeruga enti salah kena. Semina ke nemu kebuah ngaga serta ngena aja ke ulih ngena ba ni ia patut dikena. Sema jaku baka kitai nyau sebulan ditampar pala ngetatka diri. Bisi maya ia udahnya ba bulan ke dua kitai enda tat ringat, ukai setakat malas nampar, kada enda mukut terus deh. Simpul ia bala kaban, aku enda ulih tak sebubu ngapa begaga serta meri kita utai senetang virus tu. Ngaga ia ulih. Ba ungkup aku chukup nyamai ngaga ia. Sekalika kitai ka meri pengerusak ke mit tauka besai ke orang, nya ulih adu. Amai ba aku kena ia ungkup aku ga. Baka kitai ke sama bisi peninding bulu, dini kitai deka nunjukka orang tali tancang kuning ba kucik baju. Minta ampun au. Tuju ia endang semina ungkup aku empu lalu ngetan ka bala ke dampih aku aja.
SAUT UNGKUP TANYA LUMOR 3:
======================================
***👉👉👉Saut ia ulih buka lalu dipeda CD, VCD tauka DVD ke bisi di "protected" ke enda ulih peda ayan ba laptop tauka komputa kita. Diatu mayuh "Software" kena muka ia lalu ulih dipeda list ayan baka selama. Munyi ko jaku aku tadi meh, menisa ngaga, mensia ga ke nemu bedawa ka ia. Enti kita nanya aku nemu ke enda aku ngaduka utai tu, aku sigi nemu, amai meh utai tu enda tau salah tuju. Kemaya ari tu kitai selalu meda bala mensia ke salah kena lalu tuju beambi ulih ngaga celak tiru laban ke nemu ngena utai bakatu. Nya ke salah ko aku ba undang-undang kitai. Akta Hak Cipta 1987 endang terang endar madah senentang penyalah ngereja pengawa ke bakatu. Nyadi ba tanya kita ke minta tulung aku pasal tu mega, aku minta ampun laban ke enda ulih nulung kita. Enggaika lagi enti sema udah dibuka siti ia ulih di "burn" tauka dicelak tiru nyadi puluh serta ratus iti laban diatu nyamai endar keresa kena ngaga nyalin nya ulih ambi kitai ari internet serta dijual. Enti udah bakanya ia dikumbai orang "Pelanggaran Hak Cipta" tauka "Copyright Infringement". Nuju ia kala belajar IT ba Universiti tauka ba palan pelajar tinggi bukai, sigi bisi genteran pasal belajar ka utai tu. Ia tau nyadi siti penyalah lalu tau ngasuh kitai kena ukum. Nyamai meh bisi ke orijenol ko orang, baru berapa rega. Enda ga ke abis enggau ngirup ko kitai. Anang nutup periuk asi orang ke udah bendar ngeluarka ungkus bepuluh ribu kena ngaga ia, kitai lalu senang deka ngemuntangka utai. Kelebih agi ba VCD tauka DVD retis kitai Iban. Genturung kitai tu mit lalu tikas jual ia pun enda jauh. Nadai salah kitai sama bebeli ke ia ke tulin. Nyadi ke penudi ia ba semua tanya kita ba aku udah ikas ia aku nyaut ia. Awakka utai tu terang. Semua kitai bisi ungkup penemu ba siko-siko tubuh kitai. Amai munyi ko terupung " Ajaib" P. Ramlie, enti niat kitai manah, manah ga tuju ia, enti niat kitai jai, jai ga tuju ia.
Baka aku endang nyemetak madah ba ungkup pengawa ke ditanya kita ulih magang aku ngereja ia. Bisi sekeda pelajar aku kediri, bisi ke dikunsi ari orang bukai kelebih ari bansa ribai lalu bisi ke dipelajar maya aku agi belajar ba universiti suba. Nya meh mayuh keresa aku jai laban menawa nguji dulu ba keresa diri. Utai baka tu besai amat ga guna enti betul cara, amai enti salah cara orang ke enda nemu utai ga tau binasa. Semua ia tepulai ngagai cara, laban ia tau ngachau privasi orang, tau ngelarika etika kitai ke deka ngerandang, silap-silap kelalu ka kitai tau kena pangka undang-undang. Minta ampun nuju kita ke nanya serta ia ti ka minta laban aku enda ulih bedua nyanda. Ukai enda pecaya tang takutka kitai salah kena.
Aku ngena utai tu pun laban udah lama ga perinsai ke sekeda, udah lama ga ngetatka dikemelika sida. Nya kebuah aku mapal laban orang dulu nanjal. Enda ga mudah kitai ngena ke sida enti sida enda dulu ngeruga. Amai meh lalu naka sida nya aja, ukai lalu ngena ia sengapa kena. Kibung ga udah digulung, disimpan aku baru meh tudah lupung. Jemah enti agi ga digulung bantai baru ga ari karung...
======================================
"You are not what you have done, you are what you have overcome...."
Nya Aja Ari Aku, Terima Kasih
📝📝📝📝📝📝📝📝📝📝📝📝📝📝📝
~Ari Aya Kemayang Panas~
Tiada ulasan:
Catat Ulasan