TEMUDA ANANG DILUPA... TANAH ANANG DILENGKA...

Kemaya ari tu mayuh amat bendar udah bala ti rebak baru diau nemalan ba negeri laban ti bekereja. Pengiruh diri tauka laki bini sereta anak tersak di besekula ba negeri selalu ngujong ka kitai jarang amat ulih ngemulai ka diri ka menua. Nyadi siti maya ti patut alai kitai ngemulai ka diri ianya maya bisi lepa pengawa tauka ari baka maya pemisi, gawai tauka krismas. Laban aku ngasai ba aku empu lebuh maya tu datai nyau baka kasak bala anak nanya ka berita kemaya ulih ngemulaika diri ka menua. Pelaba kitai nama kebuah bala nembiak nanya pekara ti bansa nya laban sida bisi bendar ka pengerindu deka ngasai ka diri ba rumah panjai laban ti udah puas bendar besekula sereta bejalai meda utai dalam negeri.

Nyadi pekara ti baka tu tau bendar ngenyinuka kitai, kelebih agi enti menua tauka rumah panjai bisi tempat ti manah alai ngerindangka ati baka ai sungai ti manah. Kitai empu pen berasai senang ga ati enti ulih begulai rindu enggau bala nembiak rumah panjai sereta bisi menua ti beresi alai ngelantang ati. Pia mega apai indai kitai ti diau mendam di menua. Maya pemisi meh alai maya ti dianti sida deka betemu enggau bala anak uchu. Mayuh gik datai andal gik ga sida iya. Enti kitai meda bisi bala apai indai ti anak uchu enda ulih datai enda tentu bagak sida iya, sinu meh nya kini. Nyadi pekara ti bansa tu ukai ngasuh kitai pulai tiap ari ga, enda pia iya uchak setaun sekali, maya Gawai tauka Krismas maya nya meh ngemulaika diri enti kitai bekerja jauh. Enti semak menua endang sigi dikarapka pulai tiap minggu.

Tambah mega menua diatu nyau balat bendar mansang. Dalam pemansang dunya ka diatu mayuh macham pekara manah tauka jai tau nuntung menua kitai. Kediatu jalai nyau majak bisi amat pen enda manah, pia mega pekara bukai. Dalam pekara ti bansa tu, baka tunga ke menua kami kin, makin mayuh mensia beambuka tanah, temuda, memudai sereta macham. Batang idung ti nadai kala dipeda pen bisi meh datai madah ka sida kala berimba. Pia mega mayuh macham berita bukai enda ibuh aku sebut ditu. Nyadi siti padah aku ngagai kitai bansa ka diatu, mayuh amat anak kitai udah bisi pemandai. Belajar tinggi bisi degree pen udah chukop mayuh asal ari rumah panjai. Jako tangkan aku... bisi pemandai pen menua anang dilupa. Ingat asal kitai empu laban ari pemandai kita aja ulih ngetan ka menua sereta bansa kitai. Makin mayuh gik pandai nya manah gik laban kita endang sigi dikarapka orang ba rumah panjai din. Siti jako tangkan aku arapka kita tau beratika iya. Pemandai sereta pengeraja ukai kena kitai ngemedis, ngelanyai sereta ngemaruhka orang. Anang ngasai ka kitai aja pandai laban mungkin bisi ga orang lebih pandai sereta landik ari kitai. Buai penyumbong diri, ingat ka apai indai, temuda rimba, memudai empalai, kaban belayan semua di menua. Laban baka ti diadaka ari perut indai, enti sema enda bisi dimenua kelia kada kitai ulih nyamai diatu. Siru meh ke manua diri.........

 

Chukop rindu bala anak enti sema ulih pulai ka menua sereta mandi ba sungai.

Pengerindu lebuh ti ngerindang ati mandi ba sungai ti beresi sereta chiru ba menua enggau bala anak.