"SELAMAT DATANG KE BLOG INI. GUNAKANLAH IANYA UNTUK TUJUAN BERKONGSI PENGETAHUAN MEMBINA DAN POSITIF. ADALAH TIDAK DIBENARKAN SAMA SEKALI MENGGUNAKAN BLOG INI UNTUK TUJUAN MENGKRITIK DAN MENFITNAH MANA-MANA PIHAK SERTA MENYEBARKAN BERITA PALSU ATAU YANG BOLEH MENGAIBKAN DAN MEMALUKAN PIHAK-PIHAK TERTENTU. BEGITU JUGA PERKARA-PERKARA YANG BERKAITAN DENGAN ISU-ISU POLITIK TIDAK DIBENARKAN SAMA SEKALI DIBINCANGKAN DALAM BLOG INI."

21 Januari 2010

"Jambatan Batang Strap, Pantu Digaga.....!!"

"Batang Kenang Ari Meja Penulis....."


Nyadi kena ke 19.01.2010 tu tadi Kepala Menteri Menua Sarawak, Pehin Sri Haji Abdul Taib Mahmud udah bejadi muka Jambatan Batang Strap, Pantu. Jambatan ti lama udah dikenang bala rayat urung seberai Batang Strap, pantu sebengkah ari pemansang ti udah diberi perintah ti tau mai pemansang sereta penyamai ngagai bala rayat ba seberai Pantu. Nyadi laban aku siko ari bala mayuh ti berasai andal ati laban jambatan tu nyadi digaga laban ia udah lama dianti digaga. Ba runding aku empu arapka iya ulih digaga siap nitih ka timpuh ti udah ditetapka. Penyadi jambatan tu tau mai mayuh pemansang sereta penyamai ngagai bala kami seberai nyin ti ka ngena jambatan nya.



Ba aku empu laban ti beasal ari seberai nyin ianya ba Tr. Sadut, Sapak Pantu, berasai bisi penyenang mimit pulai ke menua laban sebedau tu kami semina ngarapka jalai ai/sungai aja enti ka pulai nemuai ka menua. Lebuh maya ujung taun bisi nyamai laban ai sungai besai. Pejalai ngena perau lebih kurang setengah jam mimit. Tang enti lebuh maya tengah taun, maya ai langkang nya ti bisi penanggul ba kami ti bekena ka ai sungai laban ia enda ulih tengah enti kelalu langkang. Sampai nyau ka 2 jam ngenatai ka diri ba Menua Sapak. Lebuh jalai ti bisi digaga nengah Jalai Ubah ngimbai pasar Sungai Tenggang, kami semenua bisi penyamai bebai ka kereta pulai ke menua taja pen ari simpang nya ke menua kami bisi sejam pejalai. Nyadi enti jambatan tu siap ila pejalai ari Bandar Sri Aman ngagai menua kami di Sapak semina lebih kurang 1 jam aja, enti ari pasar Pantu ke menua kira ke 20 minit aja. Nyadi kami ba urung menua seberai nyin ngelama tu bisi penyamai begusung ka pangan diri lebuh maya pengerami tauka maya bisi ka ngulu penusah. Taja pen ia jalai kayu balak ti nadai betar tauka nadai mayuh bisi batu tang baka kami urung Menua Ubah, Tekutong, Empaling, Isu, Gayau, Muding, Keranggas, Engkeranji sereta menua aku ba Sapak dia kediatu nyau bisi penyamai ngenatai ka diri ngagai semua sitak menua ba tu.



Jambatan Batang Strap, Pantu tu nelan kos Rm20.4 juta. Pemanjai iya kira ka 182.4 meter sereta berengkah digaga kena ka bulan 11 taun 2009 tu tadi lalu dijangka siap kena ka bulan 2 taun 2011. Nyadi ngagai bala ti sama ngajar baka aku berasai nyamai mimit ari penyadi jambatan tu laban 4 buah sekula ulih dilawa, baka Sk. Muding, Sk. Keranggas sereta Sk. Engkeranji. Kebuah pia laban bala pengajar ulih ngena kereta diri ngemulaika diri ke rumah diri ba urung pasar lebuh ujung minggu. Pia mega penyadi jambatan tu ulih bendar nyingkakka pemujur pengidup raya lebih kurang 23 buah genturung rumah panjai enggau pemayuh rayat kira ke lebih 4000 iko. Nyadi iya ulih nyingkakka pengidup rayat kelebih agi kena ngemansangka pengidup diri lebuh maya ka bejual ka asil betanam betupi kena ngidupka diri.



Nyadi kami rayat dia meri besai terima kasih ngagai perintah laban ti udah ngenyadika pengaga jambatan tu laban ia sigi udah lama dianti kami. Arapka udah tu ila bisi jalai ga pemansang bukai diberi kelebih agi ngaduka jalai ti udah disambung ke sepiak nyin ngena jambatan nya ulih digaga manah gi, chunto ia sungkur/gaga besai mimit, narah bukit ti kelalu tinggi, sereta ngidarka batu ba jalai nya awak ka enda licin sereta ulih tengah maya ari ujan. Arapka perintah sereta kompeni ti begaga ke jalai nya sama berakup meh "upgrade" mimit meh jalai seberai nyin awakka mai penyamai mimit ngagai bala kami sepiak nyin....... TERIMA KASIH !!!!.

1 ulasan:

  1. Endang amai ga dipadah ke nuan nya penulis, aku bisi meh udah meda jambatan batang strap nya lebuh pulai ke menua. Menua kami munggu sawa, enti ari pantu ngena perau kira 1 jam 30 minit enti ai besai, tang enti lebuh ai langkang datai ke 2,3,4 jam bebatak ngena perau. Terpaksa nganti ai pasang enggau ngenatai ke perau ba pangkalan ai Kunang. Arap ke bisi jambatan tu dikena ila lusa ulih meri pengelantang meh ngagai kami serumah enggau semua menua ti ngelinggi nya. Taja pia, jalai ti dikena nya ti agi bedau bisi manah, lebih agi enti ngagai menua kami di Munggu Sawa. Arap ka perintah jampat ka agi meh ngetar jalai ngagai menua kami kin. Baru diatu meh meda pemansang ke udah terang ti bisi dipeda ba menua kitai.

    BalasPadam