CUTI - CUTI DI TANAH MALAYA !!!!

Nyadi di baruh tu bisi sekeda cerita kami menyanak maya ti bisi bejalai raun ke Semenanjung bedau lama ti udah. Maya kami ti kin nyamai mimit laban bisi menyadi aku empu bisi din lalu ulih mai kami sebilik, sida sebilik empu enggau bala petunggal aku bejalai matau menua ari Negeri Sembilan sampai ke Kuala Lumpur. Maya tu suba mayuh tempat dipelawa kami sebala berengkah ari tempat iya kereja ianya di Rembau, Negeri Sembilan sampai ke KL. Di antara tempat ti bisi dilawa kami ianya Pantai Port Dickson, Taman Tema Padas, Muzium Tentera ba PD, KLCC, Zoo Negara, Pusat Bandar Seremban enggau Pusat Kota Metropolitan KL. Laban ari ti suntuk sereta bala budak nyau lelak, kami enda ulih bejalai ke tempat-tempat bukai. Lapa ka enda, maya dudi ari ga bejalai baru kin. Nyadi ka batang pengawa tu manah ka kaul diri sebilik, sambil kitai mai nembiak anak kitai bejalai raun, awak ka nyadi peransang sida dalam sekula sereta ulih mujur pengidup ka jemah ila. Di baruh tu aku bisi nusi sekeda cerita sereta gambar kami ti bisi diambi tu tadi;

a). Raun ba Zoo Negara Kuala Lumpur

Zoo Negara ba KL siti tempat ti manah dilawa kelebih agi kitai ari Sarawak ti enda kala tauka jarang bejalai ke menua nyin. Masuk kia kitai bisi bebayar mimit, tapi enti mai nembiak sida cukup rindu bejalai kitu laban dalam nya mayuh macham jelu ditupi. Baka sida gajah, zirafah, seladang, beruang, rimau, ular, baya sereta mayuh macham jelu bukai. Enda berasai ngembihka 3 jam bejalai mai nembiak dia laban kempaun ia cukup besai alai kitai bejalai. Enti bebala mayuh cukup rindu kia. Tambah mega engka jemah kitai ka raun ke seberai tasik, asai aku manah dulu kitai bejalai ba menua diri empu dulu. Di baruh tu sekeda gambar kami sebilik enggau kami sebala ti bisi diambi aku maya nya.

b). Raun ke Aquaria KLCC, Kuala Lumpur

Pia mega maya nya kami mega bisi bejalai bebala mayuh ke KLCC. Bisi 10 iko tubuh kami sebala bejalai kia. Masuk kia pen bisi bebayar mar mimit, tapi ati cukup puas, cuma duit aja enda berasai kosong laban bebelika barang. Ba bangunan KLCC, siti tempat ti patut dilawa ianya Aquaria iya. Ba tempat tu unik siti laban ia bisi nempat ka akuarium besai alai orang nupi mayuh bansa ikan tasik baka sida ikan pari, jerung sereta mayuh bansa ikan bukai. Enti bejalai kia kitai bejalai dibaruh iya lalu ikan nya dalam kaca tebal ba tisi tauka atas pala kitai, Pia mega mayuh jelu darat bisi ditupi dia baka mayuh macham bansa ular kelebih agi mayuh diayanka spesis ular sawa ti besai. Nama agi deh bala anak ti lebih agi rindu, nyau penat kaki begagaika sida iya. Tau nguji wai tama kitu, manah amat, cuma bayar tama ka mar mimit. Tapi asai aku maya cuti skul, bisi offer tama kia.

c). Raun Mandi ba Taman Tema Padas, Rembau

Tempat tu siti tempat ti digaga baka Mini Sunway Lagoon. Tempat tu enti ujong minggu penuh alai bala mensia ti bebaika diri sebilik ngelantangka ati kia. Ba tempat tu bisi 2 replika ai digaga sida. Siti ianya laut ti digaga, sereta sungai digaga mensia. Tambah mega dala taman tu mega bisi kolam ai panas mayuh jenis. Nyadi tama kitu bisi bayar RM7-9 nda ngira pengelama. Pia mega kena mandi kitai ulih nyewa alat dia baka pelepuk enggau mayuh bansa utai bukai. Maya tu suba bala anak rindu agi mandi bemain ka ai. Kita meda gambar dibaruhnya kiruh bala apai bebaika sida. Asai aku enti sema kita bisi ari bejalai tauka bisi bejalai ke Negeri Sembilan tau ngagai tempat tu, umbah iya pemanah iya wai. Tempat tu ari segi ekosistem iya manah agi laban baka dalam taman negara laban bisi kayu besai dalam iya, enda panas sereta nadai tentu penuh laban orang nadai baka ba Sunway Lagoon KL. Bejalai kitu meh wai... Dibaru tu sekeda gambar bala kami maya nya.

d). Mandi ba Pantai Port Dickson, Negeri Sembilan

Pantai tu siti ari pantai ti cukup beberita ba Semenanjung din lama udah. Pemanas ditu ianya pantai iya. Cuma enti mai nembiak mit mesti ka dijaga amat laban ditu kelalu mayuh orang. Aku enda sempat begambar ditu laban umbas ti kiruh ngambar budak enggau bejaga ka sida. Enda berasai ari sari embih ditu wai, laban ba tempat tu nyamai alai kitai bebelika pemakai sekalika dibungkus tauka makai dia empu. Ditu kita ulih nyewa khemah ngena bayar RM15.00 sereta perengka bukai baka pelepuk, perau, jet ski enggau main bukai. Tempat tu enti ujung minggu chukup mayuh orang ari macham pupu raban bansa. Munyi ko jako orang lengah-lengah bejalai dia mayuh ga kitai ninga bansa kitai iban enggau orang dia sereta ulih bekelala enggau sida. Mayuh agi sida nya bala kitai iban ti bisi nyadi sedadu ti diau ba Kem PD dia empu. Lalu kitu meh kaban... Dibaruh tu sekeda gambar kami sebilik / sekaban ti bisi diambi aku.

e). Raun ke Muzium Tentera ba Port Dickson

Ari keterubah nguji matau menua ba nyin kemari bala kami bisi matau menua sereta raun ngagai Muzium Tentera ba Port Dickson. Muzium tu ngundan mayuh macham cerita pasal alat tentera sereta sejarah tentera kitai kelia. Ba tempat tu bisi diayanka jenis kereta kebal, bilun jet, helikopter, kereta api ti dikena bala sedadu kelia. Pia mega ba tempat tu bisi digaga Tugu Pengingat ngagai bala sedadu ti udah lesi bebadi maya ti ngetan ka menua kitai, kelebih agi ari ancam komunis kelia. Ditulis ba tugu tu mayuh ga aku meda nama kitai iban ti bisi ditulis dia. Siti tempat ti dikerinduka aku ianya, ditu bisi digaga replika terowong / lubang tanah ti digaga Parti Komunis Malaya(PKM) kelia. Dalam tu bisi diengkahka perengka ti kala dikena sida baka senjata, pinggai mangkuk, pakaian sereta utai bukai ti kala dikena bala komunis kelia. Asai aku enti belajar sejarah ba skul pasal PKM manah bala nembiak dibai kitu, tambah mega ia enda tentu jauh ari pantai. Arapka ulih kitu meh kaban. Dibaruh tu sekeda ari gambar ti bisi diambi kami sebilik.